බතට තිත.

ලංකාවෙ හාල් පොල් මිල ඇමරිකාවටත් වඩා වැඩියි නෙවැ. අපියි කියලා කොයි විදිහකට ඔය ගානට හාල් පොල් ගන්නෙයී. ඔය කොහොම උන්ත් ලංකාවෙ අන්ඩුවනම් දෙවියෙක් වගේ. අපි ඉල්ලන ඕනෙ දෙයක් අපිට හනි හනිකට දෙනවා. ලංකාවෙ අපිට දරුවෙක් වදන්න බැහැ, ආන්ඩුවෙන් නොමිලේ වින්නබු වැඩේ කොරන්නේ නැතිව. කොලුවව ඉස්කෝලෙ යවන්න බැහැ, නොමිලේ අධ්‍යපනේ දෙන්නේ නැතිව. ඌට පනුබෙහෙත් දෙන්නෙත් බැහැ, ආන්ඩුවෙන් නොමිලේ පෙති දෙන්නේ නැතිව. දැන් ඉතින් අපිට බත් කන්නත් බැහැ, ලාබෙට ආන්ඩුවෙන් හාල් දෙන්නෙ නැතිව.

ආන්ඩුව කියලත් මොනවා කොරන්නද. ලාබෙට පොහොර දුන්නා. වතුර දුන්නා. වැව් හැදුවා. කොරන්න පුලුවන් හැම දෙයක්ම කොරා, දෙන්න පුලුවන් හැම දෙයක්ම දුන්නා. ඔය මොනවා කොරත්, ඇති ප්රයෝජනයක් නැහැ. ආන්ඩුවය කියලත් හාල් මවන්නද. ඉන්දියාවෙන්, "අනේ අපිට අනුකම්පා කරලා කොරලා, අඩුමිලට හාල් ටිකක් දෙන්න" කියලා ඉල්ලුවා. අපිත් ඉතින් හැම පුර්ස්නෙකටම අඩා දොඩාගෙන යන්නෙ අල්ලපු ගෙදරටනේ. ඉන්දියාවත් ඉතින්, "පවුනෙ, අසරනයනේ" කියලා අපිට උදව් කරනවා. මෙදා සැරේ ඉන්දියාව, පොඩ්ඩක් ඉන්න, අටුවෙ වී තියනවද කියලා බලලා එන්නම් කියලා ගෙට ගියා ගියාමයි ආයෙත් එලියට ආවෙ නැහැ. ඔන්න ඉතින් මෙදා සැරේ ඉන්දියාවෙන් ලාබෙට හාල් නෑ පුතෝ. බුරුමෙන් ගත්තු හාල් ටිකත් ගෙන්නා ගන්න හදිස්සියකට නැවක් හොයාගන්නත් නැහැ. කිසිම වැදගත් කමක් තියෙන රටක් බුරුමයත් එක්ක ගනුදෙනු කරන්න කැමැත්තක් නැහැනොවැ.

මොන දහන් ගැටේ දාලා හරි අපිට ලාබෙට හාල් දුන්නේ නැත්තම් මෙදාපාර ආන්ඩුවත් ඉවරයි. අපිත් ඉවරයි. ගොවියොත් ඉතින් කාඩාහැලිච්ච වැහි කන්දරාවත් එක්ක අඩව් අල්ලලා, කපාගත්තු ගොයම වේලලා ගෙට ගත්තා කියමුකෝ. ආන්ඩුවෙ ගොයියලාත් බලා ඉදලා ඉදලා කියපි, හාල් විකුනන්න කියලා ඒ උන්දෙලා කියනා කියනා ගානට. පාලන මිල කියලා නොවැ ඔය කෙරුවාට කියන්නේ. ඕකට මොනවා කිව්වත් හාල් මෝල් අඩා වැලපෙනවා, සල්ලි දීලා ගත්තු හාල් ආන්ඩුව කියනා කියනා විදිහට ලාබෙට දීලා දාන්නෙ කොහොමද කියලා. අනිත් උදවිය දැන් තුට්ටු දෙකට හාල් ගොවියගෙන් ගන්නවා. මට නම් ඉතින් කාට මොන කෙලිය උනත් කමක් නැහැ මෙදා මුරේ ලාබෙට හාල් ලැබෙනවානම්.

හැබැයි ගොයියෝ නිදහස් වෙලදාම කියන්නේ ඕක නෙමෙයි. අපි ඉස්සෙලාම ගොවියාට සලාක පොතට පොහොර කාරිය දීලා, වගා වියාපාරය විනාස කොලා. අපි හැමදාම ගොවිතැනට අතදරුවෙකුට වගේ කිරි පොවනවා. ඉතින් උන්දැත් කවදාවත් දෙපයින් නැගිටින්න ඉගනගන්නේ නැහැ. හැමදාම ලාබෙට පොහොර, සහනාදාර ඉල්ල ඉල්ලා අඩ අඩා ඉන්නාවා. ඒවා දුන්නේ නැත්තම් මැහි තෙල් බොනවා. මෙදාපාර ගොවියාට හොඳ ගානක් හොයාගන්න මුරේ ආවහම, අපි තග දාලා පලදාව උදුරාගත්තානෙවැ. ගොවිතැන දියුනු කොරනවා කියනනෙ ඕක නෙමෙයි. කොහොම උනත්, මේ කෙරුවාවෙ ප්රතිපල එන්නේ බර කරත්තෙන් ඊලග මුරේ.

දැන් ලෝකෙ හැම තැනම ආහාර අහේනිය. බොහෝමයක් දෙනා ගොවිතැන දාලා ගිහිල්ලා. අනිත් උදවිය, ඉරුඟු වලින් ඩීසල් පෙරනවා. මෙදා පාර තමයි ගොවියන්ටත් රජ වෙන්න පුලුවන් කාලෙ. කොම්පුටර් රැල්ලෙන් සමහර ගොයියෝ සල්ලි හෙව්වාවගේ, ගොවියන්ට ලග ලගදිම වගාවෙන් සල්ලි හොයන්න පුලුවන්. ඒ නිසා පුලුවන් කමක් තියෙන උදවිය, තියෙන දේපලක් උගස් තියලා, සිංහලේ පැත්තේ වගාවක් කෙරුවට පාඩුවක් නැහැ. ඒත් ඉතින් කවුද ඕහොමයි කියල තව දුරටත් වගා කොරන්න කැමති, ආන්ඩුව තග දාලා අස්වැන්න අඩලා ගන්නකොට. ඔය යන විදිහට ගියොත්, පොලවත් එක්ක හැප්පෙනවට වඩා හොදයි, තියෙන දෙයක් විකුනලා, ජීවන් මහත්තයාට ලක්ෂ දහයක් හමාරක් දීලා, කොහොම හරි ඇලෙස්කාවට ගිහිල්ලා මාලු ෆැක්ටරියක රස්සා කොරන එක.